Hamiləliyin 3-cü Həftəsi: Məni Nələr Gözləyir?

Tez-tez verilən suallardan biri də 3 həftəlik hamiləlik dövründə hamilənin orqanizmində baş verən dəyişikliklərdir. Əvvəla, hamiləliyin 3-cü həftəsində qarın boşluğunda qabarıqlıq olmayacağını bilməlisiniz. Qarın boşluğunda şişkinlik hamiləliyin 12-ci həftəsindən sonra demək olar ki, hər bir hamilə qadında nisbətən hiss olunmağa başlayır. Buna görə də 3 həftəlik hamiləlik qarın bölgəsinin böyüməsi üçün çox erkən dövrdür. Onu da qeyd edək ki, bu dövr çəki almağa başlamaq üçün də tezdir. 1-5 kq-ya qədər çəki artımı hamiləliyin ilk üç ayında, yəni birinci trimestrdə baş verir. Hamilələrə bu dövrdə kökəlmək üçün həddindən artıq yemək tövsiyə edilmir. Həmçini gündəlik kalori qəbulunu artırmaq lazım deyil.

Qeyd etmək lazımdır ki, bu müddət ərzində orqanizmdə nəzərə çarpacaq qədər dəyişiklik olmur. Yalnız vaginal axıntıda bir qədər artım müşahidə oluna bilər. İmplantasiya bu həftədə baş verərsə, qəhvəyi axıntı və ya yüngül ləkəli qanaxma normal qəbul olunur. Bu dövrdə qadınlar sidik nümunəsi ilə evdə hamiləlik testi edə və mənfi nəticə ala bilərlər. Ancaq menstrual qanaxma yoxdursa, yəni menstruasiya gecikməsi davam edərsə, bir neçə gündən sonra test təkrarlanmalıdır.

Hamiləliyin tipik əlamətlərindən olan qoxulara qarşı həssaslıq, ürəkbulanma, döş həssaslığı kimi şikayətlər hamiləliyin sonrakı dövrlərində yaşanır. Bu simptomların səbəbi hamiləlik dövründə bədəndə beta hCG hormonunun sürətlə artmasıdır. Lakin hamiləliyin ilk 3 həftəsində artım çox olmadığı üçün bu kimi şikayətlər də baş verməyəcək. Həkim tərəfindən tövsiyə edilərsə, hamilə bu müddət ərzində fol turşusu əlavələrini qəbul etməyə davam etməlidirlər.