Hamiləliyin 25-ci Həftəsi: Bu Həftədə Nələr Olur?

Hamiləliyin bu həftəsi hamilə qadında bir çox fiziki və emosional dəyişikliklərin yaşandığı bir dövrdür. Körpənin böyüməsi və inkişafı sürətləndikcə orqanizmdə müxtəlif uyğunlaşma prosesləri baş verir. Bu dəyişikliklərə qarın böyüməsi, döşlərdə dəyişikliklər, emosional həssaslıq, yuxu rejiminin dəyişməsi və sair daxildir. 

Qarın böyüməsi. 25 həftəlik hamiləlikdə körpə kifayət qədər böyüdüyü üçün qarının böyüməsi hiss olunur. Uterus böyüdükcə bağlar, əzələlər və oynaqlar dartılır ki, bu da bəzi qadınlarda bel ağrısı və ya narahatlığa səbəb ola bilər.

Mədədə təzyiq. Böyüyən uşaqlıq mədəyə təzyiq göstərə bilər və bu da mədə yanması və ya həzmsizlik kimi problemlərə səbəb ola bilər. Bu dövrdə az-az və tez-tez yemək, yeyərkən də yavaş yemək və dik oturmaq kimi tədbirlər görərək sözügedən narahatlıqları aradan qaldıra bilərsiniz.

Döşlərdəki dəyişikliklər. Hamiləlik irəlilədikcə döşlərin ölçüsü də böyüyür və daha da həssaslaşır. Məmə ucları da tündləşir və bəzi qadınlarda hamiləliyin bu dövrlərdində artıq süd vəzilərindən maye gəlir. Tövsiyə olunur ki, büstqalter seçimində diqqətli olasınız, rahat geyim gün ərzində sərbəst olmağınıza şərait yaradacaqdır. 

Tez-tez sidiyə getmə. 25-ci həftədə böyüyən uşaqlıq sidik kisəsinə təzyiq edir və bu da tez-tez sidiyə getmə hissinə səbəb olur. Bu hal normaldır və sidiyə çıxmadan əvvəl maye qəbuluna diqqət yetirmək, çox maye qəbul etməmək kimi tədbirlərlə aradan qaldırıla bilər.

Emosional dəyişikliklər. 25 həftəlik hamiləlikdə hormonal dəyişikliklər bəzi qadınlarda emosional dalğalanmalara səbəb ola bilər. Bəzi günlər özünüzü xoşbəxt, bəzi günlər isə kədərli və ya narahat hiss edə bilərsiniz. Dəstəyə ehtiyac duyduğunuzda yaxınlarınız və ya həkiminizlə danışmaq vacibdir.

Körpənin hərəkətləri. Hamiləliyin bu həftəsində körpənin hərəkətləri daha qabarıq olur. Körpənin hərəkətləri artıq daha güclü və daha tez-tez hiss edilə bilər. Başlanğıcda yüngül toxunuşları hiss edilirdisə, indi daha güclü təpiklər, qıvrımlar və dönmələr kimi hiss oluna bilir. 

Yuxu rejimi. Hamiləliyin bu dövründə yuxu rejimi dəyişə bilər. Bəzi hallarda böyüyən qarın, tez-tez sidiyə getmə ehtiyacı, narahatlıq və emosional dalğalanmalar səbəbindən yuxuda rahatlıq tapmaq çətin olur. Qeyd edim ki, hamiləlikdə yan tərəfli uzanmış vəziyyətdə yatmaq bədən üçün ən rahat vəziyyət hesab edilir. 

Dəri dəyişiklikləri. Hamiləliyin son həftələrində hormonal dəyişikliklər dəriyə də təsir edir. Ona görə də bəzi qadınlarda dəri daha parlaq və sağlam görünsə də, digərlərində quruluq, ləkələr və ya sızanaq kimi dəri problemləri olur. Dərinin təmizlənməsinə diqqət yetirmək, nəmləndirici kremlərdən və günəş kremindən istifadə etmək bu vəziyyəti yüngülləşdirə bilər.

Nəfəs almaqda çətinlik. Böyüyən uşaqlıq diafraqmanın hərəkətini məhdudlaşdıra və bəzi qadınlarda nəfəs almaqda çətinlik yarada bilər. Dərin nəfəs almaq, dik oturmaqla bu vəziyyəti yüngülləşdirə bilərsiniz.

Yekun olaraq bildirim ki, 25 həftəlik hamiləlikdə bir çox fiziki və emosional dəyişikliklər baş verir. Bu dəyişikliklər normaldır və hamiləlik prosesinin təbii bir hissəsidir. Bununla belə, hər hansı bir narahatlığınız varsa və ya simptomlarınızda hər hansı bir anormallıq hiss edirsinizsə, həkiminizlə əlaqə saxlamağınız vacibdir. Həmçinin sağlam bir hamiləlik üçün yaxşı qidalanma, müntəzəm idman, kifayət qədər istirahət və həkiminizin tövsiyələrinə əməl etmək vacibdir.